[ARCHIVED CONTENT] Llywodraeth Cymru | Gweinidog yn cyhoeddi £500,000 i wella’r gallu i achub o ddŵr

Hafan > Newyddion > Cyfiawnder cymdeithasol > 2009 > Gweinidog yn cyhoeddi £500,000 i wella’r gallu i achub o ddŵr

Cofrestrwch ar gyfer y canlynol: Cylchlythyr | Newyddion

Gweinidog yn cyhoeddi £500,000 i wella’r gallu i achub o ddŵr

Mae Dr Brian Gibbons, y Gweinidog dros Gyfiawnder Cymdeithasol a Llywodraeth Leol, wedi cyhoeddi £500,000 o gyllid ychwanegol ar gyfer gwasanaethau tân ac achub yng Nghymru i wella’u gallu i achub o ddŵr.

Dydd Iau 26 Tachwedd 2009

Caiff yr arian ei ddefnyddio i wella badau achub ac offer amddiffyn personol, a fydd yn gwella’n sylweddol allu’r gwasanaethau tân ac achub i ymateb i achosion llifogydd brys a chydlynu’r tri gwasanaeth tân ac achub yng Nghymru â’r safonau cenedlaethol ar gyfer achub o ddŵr.

Meddai Dr Gibbons:

“Dros yr wythnos ddiwethaf rydym wedi gweld effeithiau llifogydd difrifol gyda difrod i gartrefi, busnesau, cymunedau, ac yn fwyaf trychinebus, dau berson yn marw yng Nghymru.

“Mae Llywodraeth Cynulliad Cymru wedi ymrwymo i wneud popeth yn ei gallu i helpu’r gwasanaethau tân ac achub a’u partneriaid, fel Awdurdodau Lleol, Asiantaeth y Môr a Gwylwyr y Glannau a’r RNLI i ddatblygu strategaeth achub mewn llifogydd i Gymru. Bydd y £500,000 hwn yn rhoi hwb pwysig i’r broses drwy ddarparu badau ac offer ychwanegol i’r gwasanaethau tân ac achub.”

Meddai Paul Bates, Prif Swyddog Cynorthwyol Gwasanaeth Tân ac Achub Canolbarth a Gorllewin Cymru ac arweinydd Cymdeithas y Prif Swyddogion Tân yng Nghymru ar gyfer achub o ddŵr:

“Mae’r gwasanaethau tân ac achub yng Nghymru yn amlwg yn hynod o falch bod Llywodraeth Cynulliad Cymru’n buddsoddi yn ein gallu i achub o ddŵr. Bydd yr arian ychwanegol yn cael ei ddefnyddio i gryfhau gallu’r gwasanaeth i ymateb i sefyllfaoedd peryglus iawn, gan wella diogelwch ein staff a’r cyhoedd fel ei gilydd.”

26 Tachwedd 2009