Gwneud cais am adolygiad
Os bydd Rheolwr y Cynllun yn gwneud penderfyniad sy’n effeithio arnoch chi, bydd yn anfon ei benderfyniad atoch yn ysgrifenedig. Yr enw ar y penderfyniad ysgrifenedig yw ";penderfyniad adolygadwy";.
Os ydych o’r farn bod ein penderfyniad yn anghywir, neu os nad ydych chi’n deall y penderfyniad adolygadwy, gallwch ofyn i ni ei esbonio naill ai ar lafar neu’n ysgrifenedig. Os nad ydych chi’n fodlon â’r esboniad, gallwch ofyn i ni ei ystyried eto. Yr enw ar hyn yw adolygiad.
Ar gyfer rhai penderfyniadau, efallai y byddwch yn gallu apelio hefyd i gorff annibynnol a all newid y penderfyniad os byddant yn cytuno’i fod yn anghywir. Ewch i’r adran Gwneud cais am apêl.
Mae nifer o faterion y mae’n rhaid i Reolwr y Cynllun eu hystyried er mwyn penderfynu a fydd unigolyn yn gymwys am daliad gan y Cynllun Cymorth Ariannol (FAS) ai peidio. Y rhain yw:
- Hysbysu’r Cynllun
- Cymhwyster y Cynllun (Cynlluniau Pensiwn Cymwys)
- Cymhwyster Aelod
- Asesiad o’r Aelod (faint o’r FAS sy’n daladwy)
Pwy gaiff wneud cais am adolygiad?
Ar gyfer penderfyniadau am Hysbysu Cynllun a Chymhwyster Cynllun, pan fydd cynllun heb orffen dirwyn i ben, gall adolygiad gael ei geisio gan:
- ymddiriedolwyr neu reolwyr y cynllun hwnnw, neu eu cynrychiolwyr (lle bo Rheolwr y Cynllun wedi’i hysbysu’n ysgrifenedig); neu
- unrhyw un a allai dderbyn taliadau o`r FAS bydd y penderfyniad hwnnw`n effeithio arno;
- cynrychiolydd (a benodir gan Reolwr y Cynllun) unrhyw un a allai dderbyn taliadau o`r FAS.
Ar gyfer penderfyniadau am Hysbysu Cynllun a Chymhwyster Cynllun, pan fydd y cynllun wedi dirwyn i ben, gall adolygiad gael ei geisio gan
- unrhyw un a allai dderbyn taliadau o`r FAS ac y bydd y penderfyniad hwnnw`n effeithio arno; neu
- gynrychiolydd unrhyw un a allai dderbyn taliadau o`r FAS.
Ar gyfer penderfyniadau am Gymhwyster Aelod ac Asesiad o Aelod, gall adolygiad gael ei geisio gan:
- unrhyw un a fydd, neu a allai, dderbyn taliadau o`r FAS ac y bydd y penderfyniad hwnnw`n effeithio arno;
- cynrychiolydd (a benodir gan Reolwr y Cynllun) unrhyw un a allai dderbyn taliadau o`r FAS.
Gall unrhyw un a all ofyn am adolygiad ysgrifennu at Reolwr y Cynllun i ofyn i rywun gael ei benodi i weithredu fel cynrychiolydd iddynt at ddibenion yr adolygiad. Gall Rheolwr y Cynllun hefyd ddewis penodi cynrychiolydd o dan rai amgylchiadau.
Sut i wneud cais am adolygiad neu esboniad
Os hoffech drafod penderfyniad, neu ofyn i ni ei esbonio, cysylltwch â ni yn Uned Weithredol yr FAS (FAS OU).
I wneud cais am adolygiad, dylech gysylltu â ni cyn gynted â phosibl ar ôl cael y penderfyniad (adolygadwy) ysgrifenedig oddi wrth Reolwr y Cynllun. Os yw’r adolygiad yn ymwneud â phenderfyniad o ran Hysbysu Cynllun neu Gymhwyster Cynllun, mae’n rhaid gwneud y cais cyn pen deufis i’r dyddiad a ddangosir ar ben y penderfyniad (adolygadwy) ysgrifenedig.
Os yw’r adolygiad yn ymwneud â phenderfyniad o ran Cymhwyster Aelod neu Asesiad o Aelod, mae’n rhaid gwneud y cais cyn pen mis i’r dyddiad a ddangosir ar ben y penderfyniad (adolygadwy) ysgrifenedig.
Os gwneir cais am adolygiad y tu allan i’r terfynau amser hyn, mae’n rhaid i chi esbonio pam na wnaed y cais hwn o fewn y terfyn amser.
O dan amgylchiadau eithriadol, mae`n bosibl y byddwn yn adolygu penderfyniad sy’n ymwneud â Hysbysu Cynllun neu Gymhwyster Cynllun y tu allan i’r terfynau amser arferol. Ni fyddwn ni’n gwneud hyn ond os bydd Rheolwr y Cynllun o’r farn ei fod yn rhesymol, a dim hwyrach na 12 mis ar ôl dyddiad ein penderfyniad (adolygadwy) ysgrifenedig.
Os hoffech wneud cais am adolygiad, dylech ysgrifennu atom yn yr FAS OU. Mae’n rhaid i chi gynnwys y wybodaeth ganlynol yn eich llythyr:
- enw a chyfeiriad y person sy’n gwneud y cais;
- y dyddiad ar y penderfyniad (adolygadwy) ysgrifenedig sy’n gosod y penderfyniad rydych chi am i ni ei adolygu;
- pam rydych o’r farn bod y penderfyniad yn anghywir;
- os ydych chi’n gweithredu fel cynrychiolydd i rywun, mae`n rhaid i chi roi eich enw a’ch cyfeiriad chi a rhoi gwybod i ni a ddylem ni ddefnyddio’ch cyfeiriad chi os oes angen i ni gysylltu â rhywun am y cais;
- os yw`r cais yn un am adolygiad o benderfyniad sy’n ymwneud â Hysbysu Cynllun neu Gymhwyster Cynllun ac yn cael ei wneud y tu allan i’r terfyn amser arferol, y rhesymau pam na ellid ei wneud yn gynharach.
Caiff penderfyniadau sy’n ymwneud â Hysbysu Cynllun neu Gymhwyster Cynllun eu cyhoeddi ar y wefan hon (gweler yr adran Cynlluniau Pensiwn Cymwys ac a Hysbyswyd). Fel arfer, bydd yr ymddiriedolwyr neu’r rheolwyr yn gofyn i ni adolygu penderfyniadau sy’n ymwneud â Hysbysu Cynllun neu Gymhwyster Cynllun. Os nad yw’r ymddiriedolwyr neu’r rheolwyr yn fodlon â phenderfyniad, byddant yn gofyn i ni ei adolygu. Os ydych chi’n rheolwr cynllun ac o’r farn bod penderfyniad sy’n ymwneud â Hysbysu Cynllun yn anghywir, efallai y byddwch chi am gysylltu ag ymddiriedolwyr neu reolwyr y cynllun i drafod eich pryderon ac i holi a fydd yr ymddiriedolwyr neu’r rheolwyr yn gofyn i ni adolygu’r penderfyniad ai peidio. Mae rhagor o wybodaeth am hyn ar gael drwy gysylltu â’r FAS OU.
Ar gyfer cynllun pensiwn galwedigaethol, os bydd Rheolwr y Cynllun yn cael dau gais neu fwy i adolygu penderfyniad am Gymhwyster y Cynllun neu Hysbysu’r Cynllun, ac os gwneir y ceisiadau am yr un rhesymau a`u hategu gan yr un dystiolaeth ar y cyfan, gall roi un penderfyniad o adolygiad ar gyfer y ceisiadau hynny.
Sylwer, gallwch chi wirio a ydyn ni wedi cael cais am adolygiad ar eich cynllun pensiwn drwy fynd i’r tudalennau am Gynlluniau Pensiwn Cymwys ac a Hysbyswyd. Os ydyn ni wedi cael cais, dynodir hynny gan y llythyren "R" ar ddiwedd enw’r cynllun.
Person sydd â Diddordeb – Cynrychiolaethau Ysgrifenedig
Mae "Person sydd â diddordeb" yn fuddiolwr posibl neu’n fuddiolwr cynllun pensiwn neu ei g/chynrychiolydd a, lle bo’r cynllun pensiwn heb orffen dirwyn i ben, ymddiriedolwr neu reolwr y cynllun hwnnw. Os ydych chi o’r farn eich bod chi’n bodloni’r diffiniad hwn a bod gennych rywfaint o wybodaeth y dylai`r rheolwr cynllun Cymorth Ariannol, yn eich barn chi, ei hystyried mewn perthynas ag adolygiad sy’n mynd rhagddo, anfonwch eich sylwadau at reolwr y cynllun.